Grava publikrilata decido de la Kapitulo
En sia hieraŭa kunveno sub la prezido de la Konsulo, sen. Marie-France Conde Rey, la Kapitulo pritraktis la projekton de didaktika kantareto por prepari al la LTSEC-ekzameno pri la muzika kulturo en esperanto. La projekton nun gvidas la vickonsulo pri edukado, c-ino Perla Martinelli; inter la helpantoj estas c-ino Milena Makaveeva.
La Konsulo anoncis baldaŭan konsultiĝon kun la senataj grupestroj (Walter Zelazny, Anna Bartek, Dieter Rooke) por decidi pri la kunvoko de la ĉi-jara parlamenta sesio. Estis konfirmite ke parlamenta sesio certe okazos koincide kun la Afrika Jubilea Kongreso en Esperanto, sed se tiu ĉi prokrastiĝus al aŭtuno 2013, la Senato kaj la Forumo kunvenus ankaŭ printempofine, laŭ propono en Budapeŝto. Pli frua indiko pri Bulgario estus aktuala en 2014.
Laŭ propono de sen. Ljubomir Trifonĉovski, vickonsulo pri kulturaj aferoj, la Esperanta Civito lanĉos ĉi-monate gravan publikrilatan iniciaton, al kiu estos invitata la tuta esperanto-movadaro. La iniciaton gvidos specifa delegacio, kun c-ano György Nanovfszky kiel kunordiganto kaj sen. Giorgio Silfer kiel organiza asistanto. La kerno de la projekto konsistos el stabanoj de la nunaj Civitaj legacioj. La detaloj aperos en la koncerna dekreto post kelkaj tagoj.
[HeKo 524 5-C, 16 jan 13]
