Kvara Afrika Esperantologia Semajno
Kultura Centro Esperantista kaj SIPU, ambaŭ aliĝintaj al la Pakto por la Esperanta Civito, kunorganizos la kvaran Afrikan Esperantologian Semajnon ĉi-jare en Buĵumburo (Burundio).
La unua AfrES okazis en Lomeo, jarfine 2005, kunlabore inter KCE kaj TIETo. La dua okazis en Buĵumburo, jarkomence 2008, kunlabore inter KCE kaj SIPU. La tria, post rezigno organizi ĝin en Kinŝaso, pro manko de lokaj interesiĝantoj, ree okazis en Buĵumburo, en februaro 2011.
Ĝis nun kvindeko da afrikanoj ricevis formadon kiel esperantologoj, danke al tiuj tri Semajnoj, gvidataj de prof. Giorgio Silfer. La kvara AfrES ankoraŭ estos ĉefe gvidata de li, sed partoprenos ankaŭ aliaj prelegantoj el diversaj kontinentoj. Tio eblos ĉar AfrES-4 parte koincidos kun la Jubilea Afrika Kongreso en Esperanto (JAKE) kaj kun la parlamenta sesio de la Esperanta Civito, unuafoje en Afriko.
La dato de AfrES-4 dependas ĝuste de la dato de JAKE, ankoraŭ precize fiksota: certe en novembro 2013. Dume KCE jam selektas la partoprenontaron.
Ĉiuj AfrESanoj (de 2005, 2008 aŭ 2011) estos bonvenaj. Necesas tamen deklari sian deziron partopreni. Eblas indiki ankaŭ alian invitindan personon. Kompreneble, en kazo de selektado, la prioritaton havos la afrikanoj kun la esperanta civitaneco, kaj voĉdonintaj (ne gravas por kiu) okaze de la elektoj por la Senato, en decembro 2011.
[HeKo 526 4-B, 17 feb 13]
