SES ne emas financi afrikan kongreson
Hieraŭ disvolviĝis en orienta Svislando la ordinara jarkunveno de Svisa Esperanto-Societo. Ankoraŭfoje ĝi ne aprobis proponon de la estraro por financi projekton. Pasintjare temis pri la ideo rezigni je duono de la kredito ĉe KCE. Ĉi-jare temis pri donaco de kvin mil frankoj por financi Afrikan Kongreson en Benino, por kiu aktivas la kunprezidantino de SES.
Kiel kutime la reziston kontraŭ la elspezemo (aŭ investemo) de kunprezidantino Mireille Grosjean gvidis prezidinto Bruno Graf el Berno, kiu kontraŭproponis la duonon de tiu sumo.
Post longa diskuto la trideko da ĉeestantoj akceptis ke SES donacu ne pli ol mil frankojn el la asocia kaso. La Estraro do alvokis al libervolaj kontribuoj. Pendas la demando, pri kiu pagos la kostojn de s-ino Grosjean al kaj en Afriko.
Alia societo registrita en Svislando, Kooperativo de Literatura Foiro, estas engaĝita por organizi Jubilean Afrikan Kongreson en Esperanto meze de novembro 2013. La kostoj de JAKE pezas sur la kasoj de neniu landa asocio de UEA, nek de UEA mem.
[HeKo 528 9-A, 24 mar 13]
