Denis de la Reussille elektita al la svisa parlamento
La urbestro de Loklo (Le Locle), Denis de la Reussille, eniros unuafoje la svisan parlamenton, en la Nacian Konsilion (la proporcian branĉon, kiu ekvivalentas al la Senato en la Esperanta Civito), post la hodiaŭaj ĝeneralaj elektoj. Li reprezentas la Laboristan Partion, la plej maldekstran en Svislando.
S-ro de la Reussille akceptis la ĵuron de la Civita Senato, en la unua inaŭgura sesio de ĝia historio, 25 februaro 2002. Tiu sesio okazis en la bela Konsilia salono de la eĉ pli bela urbodomo de Loklo, sub la prezido de konsulo Walter Zelazny. Loklo (kaj ĝia urbodomo kvazaŭ kurio) gastigis plej ofte niajn parlamentajn sesiojn. La aŭguro tiam esprimita de niaj geparlamentanoj, ke iam nia gastiganto sidos sur konfederacia seĝo en Berno, nun plenumiĝis.
Konsulo Marie-France Conde Rey kaj vickonsulo Giorgio Silfer (kiel svisa ŝtatano voĉdoninta por li) esprimas al Denis de la Reussille sinceran gratulon kaj elkoran bondeziron.
[HeKo 583 1-C, 18 okt 15]
