En Latvio la simpozio pri homaranismo
Helpe de sia norda legacio la Esperanta Civito planis en Upsalo transnacian simpozion pri homaranismo, okaze de la centa datreveno de la forpaso de la Majstro. Pro diversaj malfacilaj cirkonstancoj, la simpozio estas definitive translokita al Latvio, komence de julio 2017, koincide kun la 43aj Baltiaj Esperanto-Tagoj, tempe kaj loke.
La ĉeftemo de la simpozio restas la anoncita: "La homaranisma elano en la nuntempaj religioj". La tagordo kaj la loĝiga servo devos kongrui kun tiuj de la 43a BET. La detala programo estos diskonigita tuj antaŭ printempo 2017.
Pri la partopreno kiel preleganto kaj pri aliaj projektoj subteneblaj de la Civito validas la kondiĉoj jam anoncitaj.
(Giorgio Silfer, vickonsulo kun delego pri kulturaj aferoj)
[HeKo 623 5-C, 23 nov 16]
