Legacia inaŭguro kaj literatura kafejo en Budapeŝto
La nova sidejo de la Orienta Legacio de la Esperanta Civito estos oficiale inaŭgurita 19 januaro 2017 je 17h30 en Budapeŝto: fare de la Vickonsulo nome de la Kapitulo kaj fare de la Blanka grupestro nome de la Senata opozicio.
Tuj poste samloke sekvos la 38a literatura kafejo, organizita de Fajszi Amika Rondo sub la aŭspicio de Esperanta PEN-Centro: probable ĝi estos unuafoje spektebla ankaŭ per skajpo. La fonduma vicprezidanto, sen. Anna Bartek, enkondukos la gastojn: c-ano Tihomir Lovriĉ kaj sen. Giorgio Silfer.
Lovriĉ kiel desegnisto kaj Silfer kiel aŭtoro de la tekstoj prezentos la projekton de la albumo "Esperantio vivas". C-ano Lovriĉ montros la unuajn scenojn, jam enpaĝigitajn, kaj la publiko diskutos kun la aŭtoro pri la stilo kaj evoluo de la bildstria rakonto.
Fine de la literatura kafejo estos ankaŭ elektitaj la delegitoj de FAR ĉe la Forumo, por la nova parlamenta mandato.
Informas: budapest ĉe esperantio.net
[HeKo 629 3-C, 2 jan 17]
