Esperanto en porpaca mezorienta konferenco
Esperanto-verkistoj estas invititaj de PEN-Klubo internacia al porpaca mezorienta konferenco en Hajfo (Israelo), 1-4 decembro 2010. La konferencon organizas la magistrato de Hajfo, kunlabore kun la Pac-Komitato de PEN kaj helpe de la franclingva monda komunumo.
La konferenco koincidos kun la jara Festo de festoj, kiu arigas la reprezentantojn de la tri monoteismaj religioj, laŭ zamenhofa ideo, honore al la tempe proksimaj Hanukao, Kristnasko kaj Ramadano. La ekstra programo inkluzivas viziton en la bahaaj ĝardenoj.
En la agendo estas diversaj temoj: Verki en konflikta epoko, Esprimlibero kaj konsciencolibero, La verkorajto de la virino kaj memcenzuro, medio kaj literaturo.
Por formi la delegacion de la esperanto-literaturo, bonvolu kontakti la prezidanton de Esperanta PEN-Centro, sen. Perla Martinelli: eblas ankaŭ tra nia redakcio.
[HeKo 449 2-B, 8 aŭg 10]