Forpasis Belka Beleva
Ene de unu jaro kaj kelkaj tagoj forpasis la tri ĉefaj aktorinoj de nia teatro kaj ĝia plej grava historiografino: unue Vida Jerman, due Jadwiga Gibczynska, trie Zofia Banet-Fornalowa, laste Belka Beleva, trafita de apopleksio, 85-jaraĝa, en sia hejmo en Sofio, la 22an de decembro 2012.
Ĉe la enterigo, antaŭ du tagoj, nome de LF-koop (kun kies teatrofako s-ino Beleva kunlaboris) ĉeestis la ĉefredaktoro de "Literatura Foiro", sen. Ljubomir Trifonĉovski, kiu adiaŭis la aktorinon ankaŭ kiel vickonsulo pri kulturaj aferoj (kvankam ŝi ne havis la esperantan civitanecon, male al c-ino Banet-Fornalowa).
Post la morto de Belka Beleva restas aktiva, el la iama Bulgara Esperanto-Teatro, nur Veneta Zjumbuljeva.
La februara numero de LF dediĉos al Belka Beleva omaĝajn paĝojn.
[HeKo 522 7-B, 26 dec 12]