Anoncitaj pluraj eniroj en la Pakton
Pluraj aliĝpetoj al la Pakto por la Esperanta Civito estos ekzamenataj de la Kortumo dum la venontaj semajnoj. Se la dokumentaro rezultos enorda, la aliĝpetoj estos transdonitaj al Konsulo, kiu voĉdonigos pri ilia akcepto dum la Forumo, nome la pariteta branĉo de la Parlamento, laŭ la federisma demokratio kiu karakterizas la Esperantan Civiton.
Temas pri establoj precipe en Afriko, kie jam tri membras en la Pakto: landa asocio en Kamerunio, regiona societo en Suda Kongolando kaj peresperanta organizo en Burundio. Plia landa asocio kaj plia regiona societo situas inter la aliĝpetoj el Afriko.
La Kortumo devos aparte sin esprimi pri peto de reaniĝo al la Pakto, ĉar tio estus la unua kazo en la historio de la Civito. Ŝajnas ke oni konsideros diferencon inter la statuso de paktinto eksigita pro forfalo kaj tiu de paktinto kiu eksiĝis pro decido de la propra asembleo.
Ĉiukaze la lasta vorto apartenas al la Forumo: eblas tiurilate ankaŭ modifo de la foruma reglamento (aprobita en 2002 kaj neniam tuŝita).
[HeKo 526 6-C, 20 feb 13]
