Tri numeroj de HdE survojas al la abonantaro
La abonantaro de "Heroldo de Esperanto" ricevos ĉi-monate la kongresan numeron 2013 kaj alian iom pli fruan, el junio, plus la lastan de 2012.
La kongresa numero estas grandparte bazita sur la fotoraportoj de sen. Dieter Rooke, korespondanto de HdE okaze de la ĵusa UK en Islando. La iom pli frua numero detale raportos pri la mistifika prezento rilate anoncon en HeKo, fare de skandalismaj organoj, koncerne la hipotezitan "vendon" de HdE: la artikoloj kaj komentarioj donas la okazon analizi la ĵurnalisman etikon en Esperantio. La lasta numero de 2012 entenas interalie ampleksan retrospektivon.
Kooperativo de Literatura Foiro, kiu posedas kaj eldonas la gazeton, bedaŭras pro la akumulita malfruo, kontraste al dek kvar jarkolektoj de akurata servado, kaj dankas la fidelajn klientojn pro sia pacienco.
[HeKo 537 5-A, 3 aŭg 13]
