AfrES: 43 kandidatoj, 27 akceptitaj
Kvardek tri kandidatoj el sep landoj trapasis la selektadon por partopreni en la perkoresponda kurso prepare al la dua Afrika Esperantologia Semajno (Buĵumburo, 28 decembro 2007 – 3 januaro 2008). Dudek sep estis akceptitaj, surbaze de la lingva nivelo (almenaŭ B-grado), de la ĝenerala klereco (almenaŭ abiturienteco) kaj de aliaj elementoj. Havi la Esperantan civitanecon povis helpi, sed tute ne ekskludis aliajn.
La akceptitaj kandidatoj venas el Benino, Niĝerio, Kongolando, Ruando, Burundio. Unu el ili estas virino (nur du kandidatis), el Burundio. La aĝo de la kursontoj varias inter 23 kaj 34 jaroj. Tra la prepara kurso restos la (proksimume) dek kvin plej diligentaj.
Meznombre estos unu leciono en dekado. La kursgvidanto (c-ano Giorgio Silfer) dediĉos individue al la kursanoj po duona horo, do sume laboros por la afrika Esperantio tutan labortagon semajne, almenaŭ en la komenco.
AfrES okazas sub la aŭspicio de la Esperanta Civito, kunlabore inter KCE (Svislando) kaj SIPU (Burundio). Surloka referenculo: c-ano Mushosi Birindwa.
Financa subteno por AfrES estas bonvena. Sufiĉas kontakti la redakcion de HeKo, por ekscii kiel fari.
[HeKo 319 1-C: 23 dec 06]
