TEJO ne rezignas pri fizika kongreso en 2021
La (tro?) frua rezigno de la nederlandanoj organizi Internacian Junularan Kongreson en 2020 kuntrenis ankaŭ la rezignon de la sudkoreoj pri IJK en 2021. Sed la gvidaj instancoj de TEJO intencas okazigi IJK-on fizike en 2021 kaj tial ili ĵus relanĉis konkurson, kun unua limdato 30 junio 2020.
Tio signifas ke restus malpli ol jaro por organizi la kongreson. La junulara komisiono de Kultura Centro Esperantista, kontaktita de la estraro de TEJO, respondis skeptike pro la disponebla tempo; krome ĝi ne rajtas konkursi, ĉar la oficiala anonco restriktas la kandidatiĝeblon al la solaj landaj sekcioj, kaj en Svislando ne ekzistas tia. Tuj la estraro modifis la anoncon, inkluzivante ŝancon ankaŭ por ne landaj sekcioj, ekzemple KCE.
TEJO estas esploranta ankaŭ aliajn formulojn, kun kombino de fizika alesto kaj perreta partopreno.
[HeKo 736 4-A, 4 jun 20]
