Ferdinand de Saussure finfine en esperanto
Nekredeble, sed la fama Kurso pri ĝenerala lingvistiko (1916) de Ferdinand de Saussure neniam aperis en esperanto-traduko; tamen ĝi estas esence grava verko por ĉiuj lingvistoj: oni rajtas desegni la historion de lingvistiko kiel klepsidron, kies centra stretejo koincidas kun tiu libro. La manko finfine ĉesos danke al LF-koop, kiu planas baldaŭ eldoni la tradukon faritan de c-ano prof. Fernando Pita, nun provlegatan.
La traduko metis plurajn terminologiajn demandojn, kiujn klopodas solvi apoganta terminologia rondo, kie membras la tradukinto, la provleganto kaj la tri lingvistoj kiuj partoprenis en la ĉi-jara Esperantologia Fakultato de KCE: kiel konate, monografian kurson pri Saussure tie gvidis prof. Davide Astori.
La terminologiaj demandoj rilate al lingvistiko ne elĉerpiĝas per ĉi tiu eldonaĵo. Fakte KCE planas tiuteman seminarion en somero 2021 ĉe la Esperanto-Domo en Svislando. Tiu aranĝo ne rilatas al la kursoj pri tradukarto, kiuj disvolviĝas samloke ekde 2017, kun kreskanta sukceso, kadre de projekto Nurenbergo de la Esperanta Civito. Venontsemajne ekos la kvara, kun ok fizikaj partoprenontoj, sub la kunordigo de c-ino d-ro Perla Martinelli, dojeno de la Lingva Komitato de Esperantio.
[HeKo 739 7-B, 27 jul 20]
