La esperantlingva kurso de Saussure premiere en NAKSE
La 300-paĝa "Kurso de ĝenerala lingvistiko" de Ferdinand de Saussure estos premiere prezentata en Rozoj (Costa Brava) okaze de la unua Naturamika Kultursemajno en Esperanto, 3-9 aoktobro 2022. La libro, eldonita de LF-koop, premieros per telematika interveno de la tradukinto, c-ano Fernando Pita, kaj per reala ĉeesto de gec-anoj Perla Martinelli (kiu reviziis la tradukon) kaj Alessio Giordano (kiu enpaĝigis, verkis la prefacon al la esperanta eldono, la temindekson kaj, kunlabore kun c-ano Giorgio Silfer, la glosaron).
En formato A5, kun fortika kovrilo, ronda ripo kaj silka paĝmontrilo, la libro signifas vojturnon en la lingvistika bibliografio en nia lingvo: ne hazarde ĝi estos fundamenta teksto ĉe la katedro de lingvistiko en la planata Esplora Instituto de Esperantologio. LF-koop jam pretas subteni ankaŭ la eldonon de alia tre grava verko: la dialogo "Kratilo" de Platono, elgrekigita de c-anoj Giorgio Silfer kaj Armando Zecchin, bazo de lingvoscienco dum la antikva kaj meza epokoj, almenaŭ ĝis Dante Alighieri.
La librofako de LF-koop intensigas sian aktivecon, sub la gvido de d-ino Perla Martinelli, pli kaj pli subtenata ĉe la redaktado kaj enpaĝigo de "Literatura Foiro" fare de c-ano Giordano, vicĉefredaktoro de LF ekde 2023. Ankaŭ la premiero de la komiksa albumo "Esperantio vivas" okazos dum NAKSE, en fizika ĉeesto de c-anoj Tihomir Lovriĉ (desegnisto) kaj Nicolas Vanof (aŭtoro de la teksto).
[HeKo 794 3-B, 2 sep 22]
