Pli da teatro ol kutime dum la 14a Kultura Esperanto-Festivalo, kiun Studenta Esperanta Ligo kaj Kultura Centro Esperantista organizas en Ĉaŭdefono, 28 julio — 3 aŭgusto 2025, malgraŭ la rezigno pri unupersona dramo de Henrri De Sabates.
Rinaldo Giancola kaj Giorgio Di Nucci preparas dialogojn kaj monologojn el la esperanta literaturo; premieros nova kamiŝibajo de Giorgio Silfer; gastos per pliaj prezento kaj pantomimo la germana pupteatristo Christoph Frank.
Giorgio Di Nucci koncertos fortepiane per Beethoven, dum Alessio Giordano debutos per helena liro kaj filozofia kunmeditado en unika ateliero. Anjo Amika sanktigos vian dimanĉon per la plej belaj religiaj kantoj en tre sugestia kapelo.
Ne mankos atelieroj, ekskursoj, gastronomio. Kaj tio estas nur parto de la programo, kiun enkondukos “Romanco de La Chaux-de-Fonds”, komponaĵo de Jan S. Skorupski.
Aliĝi eblas tra la konsorcia magazeno de la Esperanta Civito.