Paulo Lima, veterana esperantisto, forpasis hieraŭ en Brazilo. Li fondis, kune kun Fabricio Valle, la socialan grupon Lexus, kiu aĉetis de LF-koop la prestiĝan gazeton “Heroldo de Esperanto”.

Por celebri la Internacian Holokaŭstan Memortagon (27 januaro 2017) jam hodiaŭ EU-Parlamento kaj Eŭropa Hebrea Kongreso aranĝas ceremonion ĉe salono Yehudi Menuhin de la EU-palaco Spaak. Alparolos la ĵus elektita parlamenta prezidanto, Antonio Tajani, kaj la kongresa prezidanto, d-ro Moshe Kantor.

Momente preskaŭ ĉiu paĝo pri la KER-ekzamenoj estas fermita.

UEA planas reformojn pri la organizado de la ekzamenoj. Ne klaras, kian rolon www.edukado.net kaj ties redaktoro havos en la nova plano, pro tio ne havas sencon publikigi ajnan dokumenton, priskribon kaj informojn pri la estontaj ekzamenoj.

La Vickonsulo renkontis hieraŭ vespere la plej aktivajn belgojn kiuj havas la esperantan civitanecon (senkulpiĝis c-ano Jean-Marie Jacques) kaj aliajn bruselajn esperantistojn, por diskuto pri la eventuala influo de la brita secesio sur la lingva reĝimo en Eŭropa Unio.

Kiel jam legeble de certa tempo en la titolpaĝo, la novaĵagentejo HeKo havas oficialan poŝtan adreson ĉe la Okcidenta Legacio de la Esperanta Civito, strato Edinburgo 26, BE-1050 Bruselo, Belgio.

La gekolegoj uzantaj informojn el HeKo por artikoloj en siaj paperaj periodaĵoj estas afable petataj sendi pruvekzempleron de la koncerna numero al la supra adreso.

La fama hungara verkisto István Nemere estis alelektita hodiaŭ al la fonduma konsilio (kuratórium) de Fajszi Amika Rondo. C-ano Nemere estas la sesa konsiliano, apud gec-anoj Nanovfszky, Bartek, Martinelli, Silfer kaj s-ro Biagio Ravasz.

La nova sidejo de la Orienta Legacio de la Esperanta Civito estis inaŭgurita antaŭhieraŭ en Budapeŝto, per simpla ceremonio kie tre bonvene aperis ankaŭ granda nigrarbara torto.

La projekto “Esperantio vivas”, komiksa albumo redaktita de Giorgio Silfer kaj desegnita de Tihomir Lovriĉ, estis prezentita antaŭpremiere hieraŭ en Budapeŝto, okaze de la 37a Literatura Kafejo, organizita de Fajszi Amika Rondo sub la aŭspicio de Esperanta PEN-Centro. La gastojn enkondukis sen. Anna Bartek, vicprezidanto de FAR.

La EU-Parlamento alfrontos la britan secesion kaj alion prezidate de kristandemokrata deputito: la kandidato de Eŭropa Popola Partio, Antonio Tajani, venkis super sia rivalo de la socialdemokrata grupo, Gianni Pittella.

Tre malmultaj abonantoj de “Literatura Foiro” aldoniĝis al la PEN-anoj kiuj selektis la kandidatojn por la literatura Nobel-premio. Ili voĉdonis plejparte por Marjorie Boulton, dum la PEN-anoj kiuj ree sin esprimis, ofte modifante sian opinion, koncentris siajn preferojn al Trevor Steele kaj Giorgio Silfer.