Ekde morgaŭ deko da studemuloj partoprenos en la semajna kursaro de la Esperantologia Fakultato ĉe Kultura Centro Esperantista. Esperantologio ne konas aĝlimojn: la aĝo de la estontaj esperantologoj varias inter 23 kaj 80 jaroj; iliaj ĉefaj eduklingvoj estas la bulgara, franca, hebrea, hungara, itala, kataluna aŭ rumana. Instruos Francisko Degoul, Perla Martinelli kaj Giorgio Silfer.

  Pli kaj pli da homoj anoncas publike ke ili ne plu aliĝos al Universala Esperanto-Asocio ekde la venonta jaro. Paralele, preskaŭ ĉiutage, homoj deziras akiri la esperantan civitanecon.

En Esperantio ekzistas kvar mikrosistemoj, reference al la kvar plej gravaj organizaj subjektoj: Universala Esperanto-Asocio, Tutmonda Esperantista Junulara Organizo, Sennacieca Asocio Tutmonda kaj la Esperanta Civito. La unuaj tri estas neregistaraj organizoj, dum la Civito funkcias kiel transnacia konsorcio strebanta esti subjekto de internacia juro.

Kongrue al la mesaĝo de la Konsulo okaze de la Tago de la Pakto, ekde ĉi tiu monato la materia kapitalo de la Esperanta Civito ricevas tri pliajn aktivulojn en Ĉaŭdefono.

La 10an de aŭgusto 1998 en Ĉaŭdefono estis subskribita la Pakto por la Esperanta Civito. El tiu akto fontis la konsorcio kiu kondukis al la promulgo de la Konstitucia Ĉarto la 2an de junio 2001. Dudek jarojn poste, en la Civita konsorcio ekzistas tri kapitaloj: spirita, materia kaj ekstera.

Ankaŭ Tutmonda Esperantista Junulara Organizo havas strukturan deficiton, same kiel Universala Esperanto-Asocio. Kaj same kiel por UEA, la spezkalkulo prezentas misproporcion de tri kontraŭ kvar: TEJO enspezas tri eŭrojn, sed elspezas kvar (ĉirkaŭ 90.000 kontraŭ ĉirkaŭ 120.000 en 2017, sed simile en 2016).

Dum internaciaj esperanto-organizoj reduktas siajn servojn kaj samtempe altigas siajn kotizojn, la transnacia Kultura Centro Esperantista duonigis sian kolektivan kotizon en 2013 kaj gardas la individuan kotizon je la tarifo de 1995, kiam la nova reĝimo ekis, sub la tiama prezido de c-ano Giorgio Silfer.

Per dekreto el Varno, datita 25 junio 2018, la vickonsulo pri internaj aferoj, sen. Miroslava Kirova, (de kiu dependas la Civitana Registro) normigis la aktivecon de la Registro rilate nedeziratajn personojn.

Tre akurata kaj aktuala estas la numero 294 (aŭgusto 2018) de “Literatura Foiro”, la plej kompleta kultura revuo en esperanto, marŝanta al sia kvindeka jarkolekto senpaŭze, absoluta rekordo en la historio de la esperanta popolo.

La juĝkomisionoj de la Belartaj Konkursoj 2018 ŝparigis al UEA ĉirkaŭ mil tricent eŭrojn, ne aljuĝante premiojn en diversaj branĉoj, precipe poezio (neniun entute!), teatro kaj eseo (nur po unu): ondo ne aldonita al la maro de pli ol cent kvardek mil eŭroj buĝetitaj kiel deficito en Roterdamo.