Akto n-ro 58

1. Kooperativo de Literatura Foiro akceptas la donacon de la proprieto de malgranda apartamento situanta en Ĉaŭdefono, en la kvartalo Helvétie.

2. Malgraŭ la oficiala transdono de la proprieto en formo de formala aĉeto, ĉiuj aktivoj kaj pasivoj de la proprieto restas ĉe la donacinto, ĝis la kompleta repago de la hipoteka ŝuldo.

“Esti avino por denaskulo”: tiel c-ino Marie-France Conde Rey titolis sian prelegon kadre de la lingva kolokvo de KCE, hieraŭ matene. La Konsulo de la Esperanta Civito havis jam plenkreskajn gefilojn kaj relative aĝajn aŭ fore loĝantajn nepojn kiam ŝi eklernis esperanton.

La hieraŭa Asembleo de Kultura Centro Esperantista serene disvolviĝis en Ĉaŭdefono, kun la partopreno de naŭ el la dudek voĉrajtaj membroj (sama kvanto kiel 2014): krom individuaj Apogantoj, ĉeestis la reprezentantoj de LF-koop, de Esperanta PEN-Centro, de Feminisma Esperanta Movado (ili ĉiuj estas societoj registritaj en Svislando kaj kolektivaj Apogantoj).

Ekis hodiaŭ per enkonduka prelego de prof. Giorgio Silfer la dua kolokvo de KCE pri “Vivanta lingvo de vivanta komunumo”. Ĉi-jare ĝi havas pli internan karakteron, ĉar diversaj aktivuloj de la Esperanta Civito studas specife la fenomenon denaskismo. Krom la enkonduko de c-ano Silfer, kontribuas per siaj atestoj gec-anoj Marie-France Conde Rey, Stan Keable, Perla Martinelli.

La fonduma konsilio de Pro Esperanto (FPEF) kunvenis hodiaŭ sub la prezido de sen. Marie-France Conde Rey. La tagordo estis preskaŭ tute dediĉita al la informado kaj la strategio pri nemoveblaĵoj.

Literatura kafejo dediĉita al prof. Helmar Frank, en Landa Fremdlingva Biblioteko de Budapeŝto 18 februaro 2016, sub la gvido de d-ro György Nanovfszky, prezidanto de Fajszi Amika Rondo kaj vicprezidanto de Esperanta PEN-Centro.

La Esperanta Civito ĉeestas la laikan funebran ceremonion pro Umberto Eco, hodiaŭ en Milano ĉe la Duka Kastelo, per oficiala delegacio.

La delegacio konsistas el gec-anoj Giorgio Silfer, vickonsulo, Chiara Macconi, nome de la Esperanta PEN-Centro (kiu en 2007 kandidatigis lin por la literatura Nobelo) kaj Carmine Dello Spedale, nome de Itala Interlingvistika Centro.

Antaŭ tri tagoj forpasis en Milano profesoro Umberto Eco, kiun en 2007 la Esperanta PEN kandidatigis por la literatura Nobel-premio, kune kun d-ino Marjorie Boulton.

La Dudekunua de Februaro estas la Internacia Tago de la Gepatra Lingvo: tiel en esperanto, dum la plejmulto parolas pri patrina lingvo, kvankam ne mankas esceptoj pri patra lingvo, kiel la pola. PEN Internacia celebras ĝin kun la celo propulsi la lingvan kaj kulturan diversecon, kaj plurlingvismon ĉe la individuoj, kio estas alio ol multlingvismo ĉe la supernaciaj institucioj.

Plena salono en la Ĵurnalista Klubo en Vilno, okaze de la prezento de “Historio de la esperanta literaturo” fare de unu el ĝiaj aŭtoroj, c-ano Giorgio Silfer. La litova publiko atente sekvis la prezenton, dum kiu (pro lastaj mendoj el Estonio kaj Finnlando) eblis anonci la duan represon de la verko, en marto 2016.

La vintra sesio de la laborgrupoj de ALTE (Asocio de LingvoTestistoj en Eŭropo) ĉe la universitato de Vilno dum ĉi tiuj tagoj estis dediĉita precipe al KEFR (Komuna Eŭropa Framo de Referenco) kaj al enmigrintoj. En ambaŭ laborgrupoj nia lingvo estis reprezentata de Kultura Centro Esperantista, kun ĉeesto de la nuna prezidanto.