Komenciĝis la aŭtunaj laboroj de interna flegado kaj parta restrukturado ĉe la Esperanto-Domo en Ĉaŭdefono, kie plej aktivas c-ano Marek Bamberski, helpata de c-ano Andrzej Nawrocki (precipe) kaj de sen. Giorgio Silfer. La laborojn kunordigas Pro Esperanto kiel regio, laŭ mendo de Kultura Centro Esperantista.

Laŭ artikolo en “Heroldo de Esperanto” verkita de ak. Carlo Minnaja, retrospektive pri la lastaj tri jardekoj de la Akademio de Esperanto, Christer Kiselman estas la sola kandidato al la prezido de la Akademio, post la retiriĝo de John Wells. Li estos ankaŭ la sola nova estrarano, tial ke la ceteraj tri restas en sia posteno, sen konkurantoj.

Dum la ĵus finita PEN-mondkongreso en Islando la esperanta delegacio regalis la gekolegojn per tostoj kun italaj vinoj (el Lombardio), omaĝe al la dudeka datreveno de la agnosko pri esperanto kiel literatura lingvo, dum la PEN-mondkongreso en Santiago de Kampustelo (Galegio), 10 septembro 1993.

Multaj rezolucioj pri homaj rajtoj estis aprobitaj hieraŭ fare de la Asembleo de la delegitoj ĉe la PEN-mondkongreso en Rejkjaviko. Ili koncernis la situacion en diversaj landoj: de Rusio al Meksiko, de Popola Ĉinio al Hispanio, de Kubo al Sirio, de Eritreo al Vjetnamio, de Tibeto al Latina Ameriko.

Unu el niaj plej valoraj profesiaj aktoroj kaj probable nia plej talenta mimo forpasis hieraŭ en Varsovio: Jerzy Fornal. Lia edzino, Zofia Banet Fornalowa, mortis antaŭ nur unu jaro, kaj li ne povis elteni la doloron pli longe. Ili ambaŭ havis la esperantan civitanecon.

Tre sukcesa literatura kafejo hieraŭ vespere en la urbocentro de Rejkjaviko, kadre de la PEN-mondkongreso kaj de la paralela literatura festivalo. La agrabla lokalo IDA Zimsen estis plena de aŭskultantoj, fakte aŭskultantinoj, ĉar praktike nur virinoj ĉeestis. Ankaŭ virinoj gastis por prezenti siajn verkojn, kun la sola escepto de Giorgio Silfer.

En la sama kongresejo de la lasta UK ekis hodiaŭ la 79a mondkongreso de PEN Internacia. Komitatkunvenoj kaj laborgrupoj antaŭis la solenan malfermon, kiu tamen ne okazis podiume kaj partere, sed per akcepta bankedo kun interveno de aŭtoritatoj.

Boris Gaĝanov el urbo Velingrad estis elektita kiel prezidanto de Bulgara Esperanto-Asocio dum la 65a kongreso hodiaŭ finita en urbo Sliven.

La Esperanto-Domo en Malago prizorgos du Tagojn de la Esperanta Kulturo, 15-16 decembro 2013, sub la aŭspicio de la Esperanta Civito.

En Malago dimanĉon la 15an ekde 10h00 c-ano Bertil Nilsson enkondukos debaton pri la temo: “La kultura historio de la esperanta popolo”. Sekvos Zamenhofa bankedo, 14h30.

La hodiaŭa “urba pado” en Budapeŝto, organizita de Fajszi Amika Rondo sub la aŭspicio de Esperanta Naturamikaro, startis per vizito ĉe la eta muzeo dediĉita al la eminenta poeto Endre Ady, tute proksime al la Elizabeta ponto.