Kultura Centro Esperantista, komisiita pri la LingvoTesta Sistemo de la Esperanta Civito (LTSEC), memorigas ke ne eblas lingvotestado perkoresponde aŭ perrete: ĉiu ekzameno devas okazi en fizika ĉeesto kaj de la kandidato kaj de la testantoj, alimaniere ĝi ne estas valida.
Krome KCE atentigas ke pri esperanto nur LTSEC proponas ĉiujn ses nivelojn laŭ Komuna Eŭropa Framo de Referenco. Universala Esperanto-Asocio, funkcianta kiel eksterlanda giĉeto de hungara institucio, proponas diplomojn nur por la gradoj B kaj C.
Fine KCE rimarkigas pri oftaj blufoj en la komunikado pri lingvotestado: ekzemple atribuo al Eŭropa Unio pri agnoskoj kiujn EU neniel faras (ja KEFR dependas de Konsilio de Eŭropo) aŭ fanfaronado pri taksado de didaktikaj retejoj fare de Asocio de LingvoTestistoj en Eŭropo (ALTE). Por ke ALTE taksu, necesas kunvoki inspektoron kiu atente vizitas la koncernan institucion (kontraŭ pago); kaj la koncerna institucio ne povas esti nur virtuala (kiel edukado.net) aŭ proponi vakan domon en Roterdamo.
Komentoj
Iom bombasta retoriko oftas ĉe UEA-komunikoj. Ekzemple la aserto “ALTE ofertis bonajn servojn en la TELC-konferencejo, manĝojn, kafon, kukon, trinkaĵojn, ktp en sia sidejo”, kiu aperas en la raporto de UEA, ne respondas al la vero. La manĝoj proponitaj de TELC estis abomenaj.
Mia mesaĝo al uea-membroj estis cenzurita: “En ALTE ankaŭ estas asocioj el Ĉinio kaj aliaj ekstereŭropaj landoj. Eĉ la pridisputita teritorio de Kosovo membras en ALTE. Ekde la jaro 2009 membras KCE = Kultura Centro Esperantista en La Chaux-de-Fonds. Ĝi organizis plurajn ekzamen-sesiojn laŭ normoj de ALTE.” [fakte de Konsilio de Eŭropo]