La Konsilio de Eŭropo en Strasburgo konfidis al la Esperanta Civito, pere de Kultura Centro Esperantista, la kontrolon de la priskribiloj por la projekto LASLLIAM (Alfabetigo kaj sekundara lingvolernado por la lingva integrigo de adoltaj migrantoj). Ĉi-semajnfine niaj ekspertoj laboras en teleseminario gvidata de d-ino Lorena Bellotti (KCE-prezidantino) por plenumi la komision de KdE, kiu financas la iniciaton.
Pri LASLLIAM niaj Esperantianoj aktivas jam de kvar jaroj kadre de la Asocio de LingvoTestistoj en Eŭropo. Jam en aŭtuno 2020 la Civito realigis similan seminarion, ĉiam financatan de Strasburgo: KdE tiel multe aprezis nian kompetenton, ke duan fojon ĝi petis nian helpon.
La seminarioj uzas esperanton kiel vehiklan lingvon, laŭ eksplicita permeso de KdE; la skribaj raportoj estas en la angla (pro ALTE), sed la franca gravas en la fono, ĉar ĝuste pri la franclingvaj areoj mankis kontrolo de priskribiloj. Informa faldfolio de KdE pri LASLLIAM estis eldonita ankaŭ en esperanto, fare de la strasburga institucio, kiu celas la respekton al la homaj rajtoj en la pli ol kvardek ŝtatoj de Eŭropo.
Legu pli en “Heroldo de Esperanto”