HeKo 325 4-B, 3 mar 07
Ekde la 48a PEN-mondkongreso en 1986, la Tria de Marto estas la Tago de Verkistoj por Paco. Perspektive al la baldaŭa internacia konferenco en Bledo, kie kunvenos ankaŭ la verkista pac-komitato, indas rememori la aktivecon de PEN-Klubo en ĉi tiu kampo, ekde kiam la esperanto-centro partoprenas en la pac-komitato mem.
La verkistaro de multaj jaroj interesiĝas pri la situacio en Palestino, strebante dialogon inter la artistoj de ambaŭ popoloj en konflikto. La rezultoj estas magraj, sed almenaŭ ekzistas loko, kie israelaj kaj palestinaj intelektuloj volonte interparolas.
Pli profunda, pli intensa, sed ankaŭ pli mallonga, estis la sezono ligita kun la milito en eksa Jugoslavio. Jam ekzistis diversaj PEN-centroj, laŭ la respektivaj lingvoj kaj literaturoj, kiam Jugoslavio diskrevis. Tiuj verkistoj kutimis kunlabori inter si, kaj samtempe ili ludis prestiĝan rolon en la socio. Tio rezultis tre utila en la 1990aj. Ĝenerale, PEN Internacia faciligis la akcepton de la novaj realaĵoj, tiel ke eblu interrilati trans la novaj ŝtataj limoj.
La akcepto de novaj PEN-centroj el militareoj (kiel la ĉeĉena) emfazis la inklinon subteni la dialogon kaj la strebadon al la paco tra la prioritata agnosko de la loka memdeterminado.
Kiel kandidato al la internacia sekretarieco en 2004 (kiam li ricevis 40% de la voĉoj), Giorgio Silfer enkondukis la ideon, ke PEN Internacia partoprenu en projektoj de pac-gardado, kadre de UN kaj Unesko. Sed la propono ĝis nun ne estis valorigita.
Aldonu komenton