marto 2017

La unua numero de “Monata Informilo de KCE” atingis la legontojn. Ĝi similas al nur dupaĝa numero de “Heroldo de Esperanto”, el la epoko de LF-koop (1997-2016).

La dua paĝo estas komplete dediĉita al la aktiveco de Kultura Centro Esperantista, dum la unua enhavas ankaŭ alispecajn informojn.

Laŭ la servo interna al fondumo Pro Esperanto, februaro 2017 alportis la sekvajn variojn:

La Svisitala Radio elsendis hieraŭ dufoje preskaŭ duonhoran referaĵon de Matteo Tacconi, pri la plej fama filo de Bjalistoko kaj lia granda donaco al la homaro: esperanto.

Vilmos Benczik, Dániel Lariko Golden kaj Zlatoje Martinov gastos ĉe la venontaj literaturaj kafejoj, organizataj de Fajszi Amika Rondo sub la aŭspicio de Esperanta PEN-Centro en Budapeŝto.

D-ro Leonardo Baroncelli (emerita ambasadoro, interalie ĉe UN), prof. Giorgio Silfer (iama parlamenta ataŝeo kaj estro de ministra kabineto) kaj Louis Ferdinand von Wunsch-Rolshoven (fakulo pri informado kaj publikaj rilatoj) gvidos la unuan kurson pri la formado de Civitaj kadroj, ĉe la Esperanto-Domo en Ĉaŭdefono, 23-29 julio 2017.

Esperantio bezonas tradukistojn, interpretistojn, lingvajn perantojn. Pri tio konscias la Kapitulo de la Esperanta Civito, kiu en dato 30 decembro 2016 per dekreto de la tiama vickonsulo pri klerigado (c-ino Perla Martinelli) komisiis c-anon Carlos Spinola pri specifa tiurilata projekto.

La Kapitulo estas kunvokita al ordinara kunveno (parte skajpa) la 7an de marto 2017 je 21h00 (22h00 en Bulgario). La ĉefa punkto en la tagordo estas la preparo de la inaŭgura parlamenta sesio en Loklo, 13 aprilo 2017.

Civila Esperanta Servo estas oficiale invitita partopreni en la delegacio kiu baldaŭ vizitos Bosnion, kadre de projekto por la starigo de naturamika Domo de Paco en urbo Srebrenica. Pivoto de la projekto estas la itala sekcio de Naturamikaro Internacia, kun la subteno de fondumo Alexander Langer.

Civila Esperanta Servo estas oficiale invitita partopreni en la delegacio kiu baldaŭ vizitos Bosnion, kadre de projekto por la starigo de naturamika Domo de Paco en urbo Srebrenica. Pivoto de la projekto estas la itala sekcio de Naturamikaro Internacia, kun la subteno de fondumo Alexander Langer.