Kiam afrikano lernas fremdan lingvon, li strebas gajni finance el tiu lernado. Se ekzemple li lernas la germanan, li povos serĉi laboron en Germanio. Se li lernas esperanton, li klopodu serĉi laboron en Esperantio.
Kion proponas la nova Esperantio? La Esperanta Civito bezonas: a) lingvoinstruistojn, b) redaktistojn, c) protokolistojn, d) arkivistojn, e) bibliotekistojn, f) katalogistojn, g) kongresorganizantojn, h) deĵorantojn en kulturcentroj.
Ĉu ekzistas afrikaj esperantistoj kapablaj gajni monon per unu el la supraj oficoj? Preskaŭ ne. La afrikanoj bezonas trejnadon por meriti respondecan postenon kun honorario, utilan por la esperanta popolo.
Ĉe Afrika Esperanto-Instituto, en la Tanganika Esperanto-Domo, 9-11 kaj 16-18 februaro 2024, eblos trejniĝi pri b) kaj c). Senpage kaj prioritate, se vi havas la esperantan civitanecon. Sed la lokoj estas limigitaj: ne pli ol dek du personoj. Proponu vin tuj: aei ĉe esperantio.net , Bujumburo.
Trejnisto: prof. Giorgio Silfer, verkisto kaj organiza konsultisto.