La prezidanto de la Esperanta PEN, Bertil Nilsson el Svedio, hieraŭ gastis ĉe la literatura kafejo organizita de Fajszi Amika Rondo, kunlabore kun Landa Fremdlingva Biblioteko en Budapeŝto. La konekton al la temo donis libro pri jogo ĵus eldonita en esperanto.
C-ano Nilsson klarigis ke ekzistas multaj specoj de jogo, ĉu mense ĉu fizike praktikataj. La temo kondukis al prezento pri du hindaj kredoj: la budhisma kaj precipe la kriŝna.
El la publiko, ne multnombra sed altkvalita (interalie d-roj Bujdosó, Márkus, Nanovfszky, Wacha), leviĝis multaj interesaj demandoj, al kiuj la verkisto donis trafajn respondojn.
Estas bedaŭrinde ke budapeŝtanoj ne profitis pli multe la kelktagan restadon de tiel klera gasto, eventuale ankaŭ por demonstri al li la hungaran gastamon, tiel faman dum la pasinta jarcento.
Komentoj
31a Okt 2019 Ĵaŭ - 19h44
Mi havas absolute nenian kaŭzon esti malkontenta pri la hungara gastamo.
Aldonu komenton