Hodiaŭ en Komo (kvartalo Ponto Kiaso) okazis la malfonda Asembleo de Itala Interlingvistika Centro, kiu transdonis sian tutan bonhavon, pere de fonduso Pro Esperanto, al Centro di Interlinguistica, kies fonda Asembleo disvolviĝis tuj poste translime en Kiaso, kiel neprofitcela societo laŭ la art. 60 de la Svisa Kodo. La nova societo akceptis la bonhavon de la antaŭa.
La fonda Asembleo akceptis la statuton kaj fiksis sian adreson ĉe la honora prezidanto, d-ro Tazio Carlevaro, viale Giuseppe Motta 32, Belinzono. Ĝi elektis ankaŭ la Komitaton, konsistantan el la honora prezidanto kaj el c-anoj Giacomo Comincini (prezidanto), Alessandro Beltramini (vicprezidanto), Alessio Giordano (sekretario), Giorgio Silfer (kasisto).
La Asembleo decidis unuanime favore al la aliĝo al Pakto por la Esperanta Civito, kie delegitoj restos gec-anoj Cristina Stefani kaj Marco Picasso.
La ĉefa nuna projekto de CdI estas la telematika gazeto “Arcadia”, lanĉota en junio 2026.
Aldonu komenton