La Konsulo de la Esperanta Civito,
konforme al la artikoloj 9 kaj 27 de la Konstitucio, kaj
konforme al la artikolo 4 de Lex Lubomira pri la Registra Instanco,
DEKRETAS
la sekvan regularon pri la alireblo de la datumbanko:
Art. 1
La datumbanko de la Registra Instanco estas alirebla nur de la personoj kiuj havas la esperantan civitanecon.
Art. 2
La alireblo de la fakoj estas:
a) sen restriktoj por la heraldika fako;
b) dependa de la skriba konsento de la koncernato aŭ de lia heredinto por la biografia fako;
c) dependa de la skriba rajtigo de la direktoro de la Registra Instanco, respektive de la vickonsulo kun delegoj pri internaj aferoj, por la establa fako;
d) rezervita al la stabo de la Registra Instanco, al la Kapitulo kaj al la Kortumo por la
civitana arkivo.
Art. 3
La esploroj menditaj ĉe la fakoj estas fakturendaj laŭ la sekvaj tarifoj:
a) unu speso (la valoro de la arĝenta Zamenhof-medalo, fiksita je kvindek eŭroj) por la heraldika fako;
b) unu speso por la biografia fako;
c) du spesoj por la establa fako;
d) ĉiukaze senpaga se petita de senatan(in)o.
Art. 4
Ekde la livero de la kandidatlistoj por la Senato ĝis inkluzive la dimanĉo tuj antaŭ la baloto, la ĉefkandidatoj de ĉiuj listoj rajtas aliri la civitanan arkivon, kaj senpage.
Art. 5
La alireblo estas malpermesata al la subjektoj en konflikto ĉe la Kortumo, tiel longe kiel daŭras la arbitracio.
Art. 6
La spezoj pro la esploroj estas administrataj laŭ la artikolo 5 de Lex Lubomira.
el Ĉaŭdefono, 15 septembro 2009
Aldonu komenton