Per vizito de gimnazianoj kaj ĉiĉeronado de la kuratoro Vanja Ĵeljazkova estis fermita la ekspozicio “Esperanto en Vraca pli ol centjara”, kiu unu monaton estis vizitebla en la regiona historia muzeo de Vraco. Dek kvin paneloj kaj kvar montrovitrinoj prezentis pli ol 70 unuojn rakontantajn pri la riĉa tradicio de la loka esperantista komunumo, kies motoro komence de la pasinta jarcento estas akademiano Ivan Krestanov, poste ĝis la fino de la 20a jarcento Radoslav Triĉkov.
La ekspozicion vizitis pli ol mil personoj, interalie la partoprenantoj en la 61a kongreso de Bulgara Esperanto-Asocio, okazinta en Vraco pasintan septembron.
Dum renkontiĝo kun la direktoro de la muzeo Ilija Stojanov, la estraro de la loka esperanto-societo “Sukceso” esprimis dankon pro la efektivigita ekspozicio kaj proponis ke unu konstanta vitrino en la muzeo rakontu pri esperanto en Vraco.