Emilio Albuzzi (1933[2001]-2023) reprezentis Italan Interlingvistikan Centron en Karolovaro dum SAT-kongreso 1999, kiam la establoj aliĝintaj al la Pakto por la Esperanta Civito aprobis la malneton de la Konstitucio, promulgota en Sabloneto 2 junio 2001, post dujara konsultado.
C-ano Albuzzi membris en la estraro de IIC, kaj kunorganizis seminarion en Milano. La ceteraj ĉefaj aktivuloj plu vivas, dise tra la mondo. La tiama prezidanto, Enrico Beltramini, rezidas en Kalifornio, kiel docento pri teologio en romkatolika universitato (lia pli juna frato kandidatas al la Senato per la Blanka Listo). Marco Picasso (ruĝa senatano dum la unua mandato, 2002-06) karieris kiel redaktoro kaj verkisto en la itala. Carmine Dello Spedale estas eliranta Verda senatano.
Ili ĉiuj membris en la sama politika partio, kune kun Giorgio Silfer. La migroflua politiko aprobita de IIC ankaŭ helpe de demografia fakulo influis ĝian strategion, almenaŭ komence.
Kun malfruo la Vickonsulo eksciis pri la morto de la kara amiko. Li kondolencas al la filo.