Llibert Puig estis la plej konata kaj persista esperantlingva katalunisto, kaj unu el la plej famaj aktivuloj en la kataluna Esperantio. La du dimensioj perfekte kongruis en lia personeco, kaj formiĝis samtempe dum lia adolesko.
Li edukis kvar denaskajn esperantistojn, el kiuj la plej aĝa aktivis en TEJO dum la 1980aj. La subita morto de la filino, eĉ ne 50-jara, estis grava frapo por s-ro Puig, kiu rapide maljuniĝis. La 7an de aprilo 2018 li forpasis en Sabadell, la urbo al kiu li ligis sian tutan vivon.
S-ro Puig rolis dum jardekoj kiel organiza animo de Kataluna Esperanto-Asocio, kiun li kunfondis tuj post la frankismo. Inter liaj laŭdindaj iniciatoj situas la resurekto de la Internaciaj Floraj Ludoj, kiuj bedaŭrinde pereis dum sekretariis Abel Montagut.
Kooperativo de Literatura Foiro (unuavice kooperantoj Perla Martinelli kaj Giorgio Silfer) kondolencas al la tuta familio, kaj precipe al la vidvino, s-ino Carme, kiu estis por li ideala partnerino.
Aldonu komenton