Estas fine subskribita la kontrakto kiu ebligas al Internacia Esperanto-Muzeo en Vieno ricevi donace, nome de la aŭstra ŝtato, la historian arkivon de Universala Esperanto-Asocio, por la periodo 1908-2000. La postaj periodoj estos liverataj de jarkvino al jarkvino.
La historia arkivo migronta el Roterdamo estas pli grava trezoro ol Biblioteko Hector Hodler, malgraŭ kontraŭa klamado, interalie ĉar la libraro estas menciita en la asocia statuto. Sed ĝenerale historiaj arkivoj estas subtaksitaj en Esperantio, kompare al bibliotekoj, spite al sia valoro. Ĝuste tial la unua rekomendo el la fakrondo pri bibliotekoj en la Esperanta Civito estas modifi la direktivon Rogora inkluzivante arkivojn samgrave kiel bibliotekojn.
La arkivo de UEA migronta el Roterdamo konsistas el cent tridek naŭ skatoloj (supozeble ordigaj kartonaĵoj), klasitaj laŭ dudeko da temoj. La plejparto de la dokumentoj datiĝas post la dua mondmilito; enestas ankaŭ diversaĵoj, inter kiuj mankas gravaj raraĵoj, ekzemple la unika premstampilo de la Asocio, por seninke sigeli oficialajn leterojn: ĝi troviĝas en Svislando (nek en CDELI, nek en Kultura Centro Esperantista).
Laŭ la kontrakto, la arkivo restos disponebla por biblioteka uzo, do por konsulto, esploro kaj scienca analizo. En Vieno ĝi konserviĝos certe pli bone ol en Nieuwe Binnenweg, kie ne eblis eviti damaĝojn pro akvo aŭ ŝimo.