La membraro de Esperantlingva Verkista Asocio estas balotanta pri la transformo de EVA al literatura akademio. La referendumo estus la plej demokratia metodo, se: a) la prezidanto (Mauro Nervi) dissendus ne nur la argumentojn favorajn, sed ankaŭ la malfavorajn (de Gunnar Gällmo kaj Michel Duc Goninaz); b) procedure, unue oni decidus pri la eventuala malfondo de EVA, kaj poste oni fondus novan societon, la literaturan akademion; c) la balotiloj estus sendendaj al neŭtrala adreso, anstataŭ tiu de la prezidanto (kiu minacis demisii en kazo de malaprobo).
Laŭ la proponita statuto, la fondota literatura akademio estus io paralela kaj komplementa al la lingva akademio (legu: Akademio de Esperanto). D-ro Mauro Nervi kandidatis unu fojon al la Akademio de Esperanto, en 1998, sed ne estis elektita: li ricevis 14 voĉojn el 45. La Akademio mem havas propran literaturan sekcion, nuntempe gvidatan de prof. d-ro Humphrey Tonkin.
(fonto: EVA-ano)