HeKo 312 6-B, 12 okt 06
Samtage kun la aprobo de leĝo, fare de la franca parlamento, kiu punas mone kaj prizone la negantojn pri la historia vereco de la genocido kontraŭ la armena popolo dum la unua mondmilito, la literatura Nobel-premio estis asignita al la turka verkisto Orhan Pamuk.
Orhan Pamuk kiel kuraĝa intelektulo agnoskis la kulpojn de la otomana kaj postaj registaroj, kontraŭ armenoj kaj kurdoj. En Turkio li devis alfronti proceson pro malpatriotismo, feliĉe kun pozitiva verdikto.
La laŭro asignita de la sveda Akademio ankaŭ ĉi-jare vekos diskuton pri la literatura Nobel-premio, kiu konstante havas koloron kaj beletran kaj politikan. La du facetoj ne estas facile disigeblaj, se entute: la sola certa konsekvenco estas, ke la atento de la ĝenerala opinio estas altirita al la koncerna problemo, pli ol al la aŭtoro kaj lia verkaro.
(fonto: PEN)