Lia Urbestra Moŝto Francisco de la Torre Prados akceptis hodiaŭ la Parlamenton de la Esperanta Civito / Civitas Esperantica, fine de la inaŭgura sesio por la kvina mandato ekde la promulgo de la Konstitucio, kaj atestis la ĵuron de lojaleco al la Ĉarto de Sabloneto.
Eble la plej longdaŭra en la gvido de granda hispana urbo (dudek kvin jaroj) d-ro de la Torre esprimis sian ĝojon pro la decido kunveni en Malago, kie fondiĝis la unua esperanto-societo de la tuta hispanlingva mondo (1892). Li emfazis ke Zamenhof iniciatis esperanton kiam en Eŭropo jam ekzistis “lingua franca”, ĝuste la franca, per tio demonstrante ke nenio eternas en la monda lingva ordo, kaj la batalo ne celas iun idiomon, sed la respekton al ĉiuj lingvoj kaj popoloj, per la disvolvo de kultura alternativo.
Krome la urbestro, kiu dum sia mandato forte impulsis la progreson de Malago, parolis pri la ĉefa problemo kiun lia administracio frontas nuntempe, nome la relativa manko de loĝejoj: konsekvenco ankaŭ de la inkluzivemo karakterizanta la civiton.
D-ino Lorena Bellotti, nova konsulino, dankis la urbestron pro la andaluza gastamo, proponante ankaŭ melodian donacon: Anjo Amika kortuŝis lin per la kanzono “Málaga, marborda belo” (teksto adaptita de Giorgio Silfer).
Sekvis lia demando ĉu la senatanoj ĵuras lojalecon al la Konstitucio de la Esperanta Civito, kiun ĉiu jesis unuope, per tio konkludante la parlamentan sesion.