HeKo 570 6-B, 23 jan 15
Iniciate de Michael Müller, prezidanto de la germana naturamikaro, renkonto okazis 20 januaro 2015 en Bruselo inter li kaj la prezidanto de EU-Parlamento, Martin Schulz, kun la partopreno de Manfred Pils, internacia prezidanto, kaj Seda Orhan, brusela ataŝeo de Naturamika Internacio.
La renkonto disvolviĝis en tre amika etoso. Michael Müller emfazis la soci-ekologian justecon kiel bazan principon de la naturamika movado. Li memorigis pri la historio de la naturamikoj kaj menciis iliajn fundamentajn valorojn: demokratio, libereco, justeco kaj solidareco.
Manfred Pils prezentis la rezervojn de la naturamikoj pri la nova EU-Komisiono, specife pri ties konsisto, politikaj prioritatoj kaj laborprogramo (ĉi-rilate legindas ĵusaj komunikoj de Green 10), kiuj neglektas la aktualan grandan temaron rilate la mediprotektadon kaj la daŭreblan evoluigon. Li emfazis la opozicion de la naturamikoj kontraŭ la decido de la Komisiono repreni gravajn leĝoprojektojn rilate medion. Li rimarkigis krome la fortajn zorgojn de la naturamikoj pro la intertraktado pri TTIP.
La naturamikoj daŭrigos la politikan dialogon kun la decidantoj je EU-nivelo.