Sukcesa literatura kafejo hodiaŭ vespere ĉe la orienta legacio de la Esperanta Civito en Budapeŝto, honore al c-ano Gyorgy Nanovfszky, prezidinto de Fajszi Amika Rondo kaj Hungaria Esperanto-Asocio. Fizike ĉeestis interalie la vidvino, d-ino Maria Gerecz (kiu legis koncizan sed kortuŝan oracion), la nova prezidanto de HEA (veninta el urbo Gyor), la nova esperanto-referantino de la Landa Fremdlingva Biblioteko kaj almenaŭ du artistinoj: c-inoj Anjo Amika kaj Perlo Miela.
Inter la skajpe kuplitaj, c-ano Giorgio Silfer rakontis personajn rememoraĵojn pri d-ro Nanovfszky, kun kiu li kunlaboris dum jardekoj. Tiel reliefis la figuro de hungara intelektulo, multflanke klera kaj ofte ironia: tia hungaro, kia estis iu amiko de la patro de Marguerite Yourcenar, priskribita en ŝia verko “Arkivoj de la nordo”.
Gec-anoj Giorgio Silfer kaj Perla Martinelli gastos en la venonta literatura kafejo, samloke sub la aŭspicio de la Esperanta PEN, 18 novembro 2021.