La balotiloj por la Senato de la Esperanta Civito povas atingi la respektivajn balotejojn nur ĝis la 20h00 CET de la 15a de decembro 2024: post tiu horo ili ne plu validos.
La skrutinioj okazos ekde tiu horo, laŭ la diversaj horzonaj ebloj kaj lokaj cirkonstancoj. La rezultoj estas komunikendaj al la adreso civito [ĉe] esperantio [punkto] net (civito[at]esperantio[dot]net) kiel eble plej baldaŭ. Ili estos afiŝitaj en la oficiala organo de la Esperanta Civito, nome HeKo, nur kiam ĉiu balotejo estos plenuminta sian sendon. Probable tio ne okazos jam la 16an, sed la 17an aŭ 18an de decembro.
Post la afiŝado de la rezultoj la eliranta Konsulo, Riichi Karibe, kaj Vickonsulo, Giorgio Silfer, ĉesos ofici: ili mem eĉ ne estos plu senatanoj. La ofico estos transdonita al la nova Konsulino (ja la ĉefkandidatoj de ambaŭ listoj estas virinoj), kiu havos tri monatojn da tempo por kunmeti la novan Kapitulon, ratifotan de la nova Senato okaze de la inaŭgura parlamenta sesio, en Malago, 31 marto 2025. La elirantaj estos invitendaj, sed ne plu voĉrajtaj.
La nova Kapitulo povos kunsidi antaŭ ol la Senato ratifos, por garantii la ordinaran administradon.