HeKo 597 1-C, 30 mar 16
Sekve de alarma informo el gecivitanoj en Afriko, la Kapitulo de la Esperanta Civito komisiis fondumon Pro Esperanto ekrilati kun asocio Anna Paolizzi en Italio, posedanta la samnoman lernejon en Kinŝaso, kie de kelkaj jaroj centoj da lernejanoj praktikas esperanton, laŭ iniciato de la karmemora pastro Duilio Magnani. La lernejo estas vendata al kongolanda privatulo, pri kies intenco rilate nian lingvon mankas certeco.
La estraro de asocio Anna Paolizzi invitis al renkonto la reprezentantojn de Pro Esperanto: hieraŭ en la sidejo de Rimino kunvenis c-ano Carmine Dello Spedale (fonduma konsiliano) kaj sen. Giorgio Silfer (prokuristo) kun la tri gvidantoj de la asocio, s-roj Renato Berti (prezidanto), Enzo Scatassa kaj Nicola Vitullo.
La estraro de la asocio promesis ke la instruado pri esperanto daŭros en Kinŝaso, ĉar ĝi estas unu el la prioritataj kondiĉoj por la vendo. Aliflanke, la vendo mem ne estas jam definitiva, kaj la asocio demandis ĉu FPEF povus helpi por la lernejo. La respondo de la Civita delegacio estis negativa, se la posedanto ne estus esperantisto, kaj pozitiva, se la lernejo restus proprieto de la disĉiploj de pastro Magnani.
La kunveno okazis en tre agrabla atmosfero.
(HeKo 597 1-C, 30 mar 16)