La unua Andaluza Esperanto-Rendevuo spertis hieraŭ altnivelan ekskurson tra la historio de Andaluzio, per prelego de sen. Alessio Giordano pri Blas Infante, la hispana apostolo de la federisma idealo, kiu sukcesis enkadrigi la strebon al regiona aŭtonomio en la vastan horizonton de homaranismo, kaj tial lernis ankaŭ esperanton.
La prelego okazis proksime al la katedrala absido, en la agrabla etoso de la restoracio El Jardín, elektita pro ĝia naskojaro 1887, la sama de esperanto, kiu regalis la rendevuanojn per aperitivo kaj andaluza tagmanĝo. Kvarono de la ĉeestantoj estis hispana, aliaj eduklingvoj reprezentitaj (krom la du hispanaj, nome la kastilia kaj la kataluna) estis la bulgara, estona, hungara, itala, ukraina; triono ne aĝis pli ol tridek kvin jarojn, kio montras la kreskantan intergeneracian karakteron de la Esperanta Civito.
D-ro Giordano vaste enkondukis la temon per profunda historia analizo pri la evoluo de la konceptoj de etno, demoso, nacio – tiu analizo estas interesa kontribuo al raŭmismo kaj emfazas la novecon de Esperantio rilate al kultur- kaj lingvopolitikaj difinoj.
Aliaj partoj de la tago estis dediĉitaj al la malkovro de Malago kaj ĝiaj tre valoraj muzeoj, kun vespera gastronomia konkludo en restoracio kun japana kuirarto.
(Legu pli en “Heroldo de Esperanto”)