HeKo 427 2-B, 3 mar 10
Lu Wunsch-Rolshoven gvidis semajnfinon pri informado en Kultura Centro Esperantista, kiun partoprenis kadroj kaj aktivuloj el Francio, Italio, Svedio, Svislando, 27-28 februaro 2010. Unu el ili, sen. Bertil Nilsson, tiel priskribas la aranĝon:
“Ĉu informi por varbi varbanton por nia laboro plibonigi la mondon? Aŭ informi por doni al la publiko ŝancon riĉigi sian vivon per esperanto? Dum du tagoj Wunsch-Rolshoven, gvidanto de EsperantoLand, montris kiel la du celoj postulas malsamajn alirojn kaj donas grave diferencajn rezultojn. Aldone la partoprenintoj ricevis multajn praktikajn konsilojn.”
La trejnado precipe enfokusiĝis al la intervjuado. La debato, ankaŭ ekster la seminariaj horoj, estis vigla kaj reciproke stimula.