HeKo 586 8-A, 7 dec 15
Tutmonda Esperantista Junulara Organizo dungas du oficistojn por duontempa administra kaj publikrilata laboro. La salajro ne ŝajnas bagatela, ĉefe laŭ orienteŭropaj (sed ankaŭ sudeŭropaj) parametroj: la duono de preskaŭ mil okcent eŭroj. Des pli ke ne necesus setli en Nederlando (sed eble ĝuste tian rezidon iuj strebas).
La unua kandidato estis tuj akceptita de la estraro de TEJO: temas pri s-ro Mounil Abjou, iama TEJO-volontulo el Maroko. Pri la dua posteno mankis interkonsento kaj la estraro transdonis la varman terpomon al la komitato.
Efektive por tiu dua posteno kandidatas 27-jara nikaragvano, s-ro Uriel Gurdián, kaj la ĵus nereelektita prezidanto de la organizo, Lukasz Zebrowski el Varsovio. En TEJO iama tendenco estis, ke oficistoj iĝas estraranoj: ĉu nun eksestrarano iĝos oficisto?