Unu el la plej famaj universitatoj en la mondo, MIT en Usono, gastigis en la nuna semestro esperanto-kurson, kiu kulminis per literatura seminario. La iniciaton proponis kaj kunorganizis d-ro Francesco Maurelli, vicprezidanto de TEJO, nuntempe esploristo pri robotiko ĉe MIT.

Gec-anoj Marie-France Conde Rey kaj Giorgio Silfer ĵus finis la redaktadon de la franclingva kajero pri la kultura historio de Esperantio, eldonota ĉi-jare de Esperanta PEN-Centro. La hispanlingva varianto estas jam preparata en Meksiko, kunlabore kun d-ino María Elena Ruiz Cruz, verkistino.

Kultura Centro Esperantista liveris al la presejo la duan numeron de sia monata informilo, “Heroldo de Esperanto” n-ro 2281 (februaro 2018). La numero dediĉas atenton al la interna evoluo de la tri ĉefaj subjektoj en Esperantio: UEA, TEJO kaj la Esperanta Civito.

La estraro de Tutmonda Junulara Esperantista Organizo elektis urbon en Slovakio, Liptovský Hrádok, kiel sidejon de la Internacia Junulara Kongreso en 2019.

Hodiaŭ en la Tago de la Memoro pri la Holokaŭsto, ni povus celebri ankaŭ la sepdekan datrevenon de la publikigo de la poemo “Al la juda foririnto” de c-ano Leen Deij. Tio bedaŭrinde signifus enkonduki polemikon, ĉar parto de la esperanta popolo ne komprenis ĝustatempe la enormecon de la nazia danĝero.

Preskaŭ neniu volas ke s-ro Brunetto (Bruĉjo) Casini estu ĝenerala sekretario de Universala Esperanto-Asocio: jen la sola klara indiko el la ĵusa baloto de la UEA-Komitato. Pri la cetero, regas nokto kaj nebulo.

Pedro Carrillo, aktoro kaj reĝisoro, proponas realigi spektaklon en Burundio, okaze de la venonta Kristnasko. Temas pri “kripa prezento”, kun muziko kaj kantoj, ilustranta la naskiĝon de Jesuo. De pluraj jaroj c-ano Carrillo enscenigas tian religian akton en Andaluzio: li opinias ke afrikanoj tute taŭgas por tiu ĝenro.

La kazo Dmitrij Bogatov evoluas espereble al bona solvo por la akuzito. La rusa ministerio pri internaj aferoj, pere de propraj ekspertoj, ne konstatis lin kulpa pro alvokoj al terorismo. Tamen la juna moskva esperantisto restas en hejma aresto: li rajtas nek eliri nek komuniki eksteren, escepte al gefamilianoj.

Nur ses virinoj situas inter la 52 vivantoj en la libro “Nia diligenta kolegaro”, kiu ampleksas ducenton da plej gravaj esperantistoj en la mondhistorio, laŭ la opinio de la eldonejoj (Sezonoj en Rusio kaj LEA en Litovio).

Preskaŭ unuanima indiko pri la krizo de Universala Esperanto-Asocio, kiel ĉefa bemolo de la jaro 2017, laŭ sondado farita de “La Ondo de Esperanto”. Tamen estas interesaj la diversaj nuancoj.

Sekve de kontakto inter Esperanta Naturamikaro kaj la kultura societo Sociedad Erasmiana, hieraŭ ĉi-lasta invitis prof-ron Giorgio Silfer prelegi en la hispana pri la originoj de esperanto, koincide kun la centa datreveno de la forpaso de Lazaro Ludoviko Zamenhof, en prestiĝa sidejo ĉe la urbocentro de Malago.