Kultura Centro Esperantista anoncas la unuan liston de la studantoj akceptitaj por la 5a Afrika Esperantologia Semajno, kiu disvolviĝos en Buĵumburo fine de decembro 2018.
Ili estas gec-anoj Moresson Feidangaï, Augustin Kakozwa, Kuluba Mbomba, Tharcisse Ndayizeye, Asha Ndikumana, Eric Nsengiyumva, Abasi Nshimirimana, Honoré Sebuhoro, Muruta Shabani.

Kultura Centro Esperantista organizis 14 julio 18 sian unuan lingvotestan sesion dum ĉi tiu somero. Kiel konate, laŭ delego de la Esperanta Civito (tra direktivo Mühlemann) KCE estas la sola institucio kiu diplomas pri ĉiuj ses niveloj de la Komuna Eŭropa Framo de Referenco: UEA, kiel eksterlanda giĉeto de hungara institucio, asignas diplomojn nur laŭ B1, B2 kaj C1.

Tre agrabla semajno, vetere kaj etose, stude kaj distre, en la Esperanto-Domo de Kultura Centro Esperantista, 10-15 julio 2018, kie paralele al A2-nivela kurso disvolviĝis la dua eksperimenta staĝo kadre de projekto Nurenbergo.

La Komitato de Kultura Centro Esperantista kunvenis hieraŭ en Ĉaŭdefono, ekzamenante la internan situacion, la kulturan programon kaj la organizajn perspektivojn.

Al la direktoro de Lexus, Brazilo
La sidejo de LF-koop situas en Svislando, kiu bedaŭrinde ne koincidas kun via itinero [ĵus komunikita pri via prelegvojaĝo en Eŭropo]. Neniu reprezentanto de LF-koop partoprenos en la kongresoj de vi menciitaj. Do ni ne vidas kiel eblas renkonti vin fizike, krom se vi modifus vian itineron. Tiam vi estus bonvena al nia sidejo.

La ordinara Asembleo de Feminisma Esperanta Movado disvolviĝis kvorume hodiaŭ posttagmeze en Ĉaŭdefono, ĉe la Esperanto-Domo de Svislando. Aprobinte la aliĝon de novaj membroj el Britio kaj Hispanio, la Asembleo pritraktis la diversajn iniciatojn de FEM.

La dua eksperimenta kurso pri beletra tradukado ekos morgaŭ ĉe Kultura Centro Esperantista, sub la gvido de d-ino Perla Martinelli. Partoprenos literaturaj tradukantoj el Anglio, Francio kaj Italio, kiuj dediĉos sin al la esperantigo de la dramo “Fin de partie”, verkita de Samuel Beckett. Recenzo pri la dramo aperis en “Literatura Foiro” jam en 1974.

La esperanta literaturo estis en la fokuso de la dua tago de BET en Pärnu (Estonio). Al multnombra publiko (sed ne tiel multnombra kiel kutime en Litovio dum ĉi tiu aranĝo) prelegis unue prof. Giorgio Silfer kaj poste d-ino Perla Martinelli.

Laŭ invito de la prezidanto de Esperanto-Asocio de Estonio, s-ro Tonu Hirsik, hodiaŭ matene la Konsulo de la Esperanta Civito inaŭguris per mallonga alparolo la 54ajn Baltiajn Esperanto-Tagojn, kies unua renkonto, sub la nomo Baltia Esperanto-Tendaro, okazis antaŭ sesdek jaroj en Latvio.

“La Esperanto-Instituto de Estonio, fondita post la unua mondmilito, neniam estis formale malpermesita. Simple ĝi nun daŭras laŭ novaj fortoj” deklaris c-ano V. Hromov hodiaŭ en Arensburgo/Kuuresaare, bonvenigante la Konsulon de la Esperanta Civito ĉe publika renkonto en la kulturdomo de la estona urbo, kiu kandidatas kiel kultura ĉefurbo de Eŭropo.