HeKo 733 1-C, 22 apr 20
La Kapitulo de la Esperanta Civito kunvenis hodiaŭ unuafoje, sub la prezido de la nova Konsulo, Riichi Karibe. Sen. Karibe invitis ankaŭ la dojenon de la Lingva Komitato, c-inon Perla Martinelli, eksa vickonsulo (kies delegon pri informado li mem transprenis: de li dependas, interalie, la retagentejo HeKo).
Kiom influas la nuna pandemio al la ekonomia stato de Esperantio? Multe kaj malbone. La enspezoj en Esperantio plejparte dependas de la kotizoj, ĉu societaj ĉu kunvenaj. La neokazigo de UK kaŭzas perdon al UEA, multe pli ol al SAT la eventuala neokazigo de la kongreso en Bjalistoko.
HeKo 732 8-C, 16 apr 20
La nova Konsulo, sen. Riichi Karibe, unuafoje kunvokis la Kapitulon al skajpa kunveno, okazonta merkredon 22 aprilo 2020 ekde 10h00 (mezeŭropa tempo). Al la kunveno estas invititaj ankaŭ lia provizora asistantino, c-ino Manuela Blanco, kaj la dojeno de la Lingva Komitato, c-ino Perla Martinelli.
HeKo 732 7-C, 14 apr 20
La “Tago de Ĉiuj Pioniroj”, unu el la oficialaj festotagoj en la Esperanta Civito, ĉi-jare koincidas praktike kun du jubileoj, kiuj koncernas du gravajn pionirojn: la forpaso de Hector Hodler, kunfondinto de Universala Esperanto-Asocio, kaj la fondo de “Heroldo de Esperanto”, fare de Teo Jung.
Okaze de sia centjariĝo “Heroldo de Esperanto” planas reveni al sia tradicia kvarpaĝeco, en formato A3. Tiucele la redakcio havos plian konstantan kunlaboranton, nome c-anon Herman Deceuninck.
HeKo 732 5-C, 9 apr 20
La vickonsulo pri financoj proponis novan kvestoron por la mandato 2020-2024. La kasisto de la Parlamento ne okupiĝas nur pri la kuriaj kostoj, sed ankaŭ helpas organizi la vojaĝojn al urbo de la Senata sesio: scipovo de gravaj turismaj lingvoj, kiel la franca kaj la angla, estas tre oportuna tiurilate, apud sperto pri la seancoj de la Parlamento.
Kanadaj aŭtoritatoj malpermesis ĉiun internacian kongreson ĝis la fino de aŭgusto 2020, pro la pandemio origininta el Popola Ĉinio, kies plej fama viktimo fariĝas do la 105a Universala Kongreso, almenaŭ rilate Esperantion.
Duolingo, lernu.net kaj aliaj retkursoj rimarkinde sukcesis dum la lastaj jaroj, almenaŭ kvante. Malgraŭ tiu kresko, la membraro de la tradiciaj esperanto-societoj stagnas aŭ eĉ regresas kvante. Kial?
HeKo 732 2-C, 5 apr 20
Neniu aranĝo kadre de la Pakto por la Esperanta Civito estas nuligota aŭ prokrastota pro la nuntempa pandemio, krom se la aranĝon mem malpermesas neesperantista aŭtoritato. Tial la kalendaro de ĉiuj paktintaj establoj povas resti senŝanĝa, specife la somera programo de Kultura Centro Esperantista.
“La kotizo ne estas repagebla, senkonsidere ĉu la aliĝinto ne povas partopreni la Kongreson pro propra volo aŭ pro iu ajn ekstera kaŭzo, eĉ se la Kongreso ne okazas, aŭ okazas en alia urbo. La kotizo inkluzivas neniun asekuron. Kongresaneco ne estas transdonebla al alia persono.”
Pri Akademio Literatura de Esperanto (en kies membraro ĉirkaŭ kvinono de longe mortis) estrarano Nicola Ruggiero publike konfesas: “Mi kreis novan retejon jam antaŭ jaroj. Mi mem kulpas pri neĝisdatigo kaj esperas en la venontaj tagoj ĝisdatigi ĝin.”
En Esperantio la kongresa sezono 2020 proksimas al katastrofo, same kiel la tuta turisma mondo, pro la epidemio origininta el Popola Ĉinio. Somere eble saviĝos nur malgrandaj kursoj kiuj ne arigas pli ol kelkajn personojn, kiel la altnivelaj staĝoj de Kultura Centro Esperantista en Svislando; kaj probable okazos la aŭtunaj aranĝoj.
