Marcos Cramer esprimis publike ĉi tiun opinion: “la Esperanta Civito celas al firmigo de la nuna stato de Esperanto kiel lingvo de lingva malplimulto, kaj sekve kontraŭas nian celon de Esperanto kiel internacia lingvo por ĉiuj.”
Kiel jam anoncite, la fonda asembleo de la societo Esperanta Naturamikaro okazos ĉe notario en Malago (Hispanio) la 16an de novembro 2009.
Kiuj deziras pli da informoj, kaj kompreneble la naturamikoj konfirmontaj sian aliĝon, tiuj estas petataj sin turni al naturamik ĉe esperantio.net, la provizora retadreso de la fondota societo.
Amin Maalouf rezignis pri sia kandidateco al la ofico de internacia prezidanto de PEN-klubo. La franclingva mediteranea verkisto estis proponita de la Franca kaj de la Norvega centroj, kutime diverĝaj inter si.
Dum la ne brila rezulto de la lastaj elektoj por la EU-Parlamento ne senkuraĝigas hungarajn esperantistojn, kiuj estas fondantaj sian landan branĉon de la partio Eŭropo-Demokratio-Esperanto, en Germanio aperis kurioza fenomeno.
Kultura Centro Esperantista gastigos esceptajn ĉefprelegantojn el Ruslando kaj Germanio, okaze de la Kulturaj Monatfinoj kiuj disvolviĝos en la Esperanto-Domo de Ĉaŭdefono, komence de 2010: Aleksander Korĵenkov kaj Louis Ferdinand von Wunsch-Rolshoven.
Kiel tradicie, ankaŭ venontjare la Asembleo de Kultura Centro Esperantista okazos dum la lasta sabato de januaro (nome la 30an, matene) kaj la ĝenerala Asembleo de Kooperativo de Literatura Foiro dum la lasta sabato de februaro (nome la 27an, matene) ĉe la Esperanto-Domo en Ĉaŭdefono.
Eksterordinara asembleo de Societo Yvonne Martinot, posedanto de “La Kvinpetalo”, fine de oktobro en Bureso. La staĝejo iniciatita de LF-koop (kies simbolo speguliĝas en la nomo), de kelkaj jaroj sen ajna formala ligo kun la kooperativo, frontas malfacilan situacion, unue pro malmultiĝo de staĝanoj, due pro manko de homfortoj por sia funkciado.
Verkistoj el la tuta mondo, inkluzive de esperantlingvaj, gastos en Linz (Aŭstrio) ekde hodiaŭ pro la 75a PEN-mondkongreso, kiu ĉi-jare inkluzivas la internacian lanĉon de la literaturfestivalo “Libera la Vorto!”.
Hieraŭ startis la senatokonsulto pri la leĝopropono prezentita de du senatanoj el la Verda grupo: Anatolo Gonĉarov kaj Perla Martinelli. Temas pri normigo de la donacoj ricevitaj de la Konsulo kaj aliaj gecivitanoj en sia ofico de reprezentantoj de la Esperanta Civito.
Okaze de sia ĵusa 90-jariĝo prof. Pierre Babin, unu el la plej popularaj esperantistoj en Francio, ricevis gratulan leteron de sia samlandanino sen. Marie-France Conde Rey, prezidanto de Feminisma Esperanta Movado. Ankaŭ la redakcio de “Heroldo de Esperanto” intervjuis lin.
