La plej supra instanco de la anarkomondialismo, la Kongreso de la Popoloj, estas de nun trione renovigebla ĉiun trian jaron, po dek kvin delegitoj. Detaloj pri la kandidatiĝoj situas en la retpaĝoj de RECIM, la mondcivitana registro.
Hieraŭ dum la 17a Togolanda Esperanto-Kongreso kompletiĝis la tria lingvotesta sesio en Afriko, rajtigita de Kultura Centro Esperantista pere de TIETo. Ekzamenis c-anoj Mensah B. Attiogbe-Agbemadon, Koffi Doumegnon, Koffi Gbeglo. Unuafoje okazis ankaŭ B-gradaj ekzamenoj en la nigra kontinento.
La sola ĉiujare okazanta internacia naturamika semajno en esperanto estas programita por 20-25 junio 2010, kiel kutime en Grindelvaldo, la plej pitoreska loko en la svisa Alparo. Organizas Kultura Centro Esperantista kaj Esperanta Naturamikaro.
Pro aĝo kaj malsano, kiu preskaŭ blindigis lin, c-ano Raymond Boré en Ĉamberio (Savojo, Francio) rezignis pri la statistikado de Zamenhof-Esperanto-Objektoj.
La Asembleo de la kooperativo posedanta Greziljonon, 16 majo 2009, aprobinte la moralan kaj financan raportojn de la Komitato, decidis eksigi ĝin bloke. El tiu paradoksa decido (aprobi la raportojn kaj tamen forsendi la raportintojn) rezultis ke, ene de ses monatoj, eksterordinara Asembleo elektos la novan Komitaton.
