septembro 2023

Hodiaŭ la naturamika Esperanto-Domo rekomencis sian aktivecon per la jam tradicia (preskaŭ) semajna renkonto, tamen ne plu ĵaŭde sed vendrede vespere je 18h00. Temas pri la sola kluba aktiveco en Malago: loka societo ne plu kunvenas kaj eĉ perdis la rajton organizi esperanto-kurson en publika strukturo por adoltoj. La “verdaj vendredoj” ree okazos la 15an kaj 22an de septembro, la 20an kaj 27an de oktobro, pro la aktiveco por la Naturamika Kultursemajno en Rozoj (1-7 oktobro 2023) kaj la ponto meze de oktobro.

La telematikaj fakrondoj ree aktivas ekde la venonta semajno. La unua estos la rondo pri Danuba Esperanto-Rendevuo (18-20 majo 2024), dum kies paŭzo probable okazos Parlamenta sesio: kunsido fiksita je ĵaŭdo 7 septembro 2023, 15h00, kun regula ripeto ĵaŭde. La kunsido devos konsideri ankaŭ la tempan proksimecon de DER en Budapeŝto kaj Eŭropa Esperanto-Kongreso en Strasburgo.

La Abeletoj rendevuas lunde je 17h00, unuafoje 11 septembro 2023. Ili diskutos pri la 13a Kultura Esperanto-Festivalo, kunvokota al Ĉaŭdefono 5-11 aŭgusto 2024. La Formiketoj rendevuas pri Naturamika Kultursemajno en Esperanto (NAKSE) marde je 17h00, tuj antaŭ la fakrondo pri bibliotekoj kaj arkivoj, unuafoje 12 septembro 2023 je 17h30.

La dua NaturAmika KulturSemajno en Esperanto (NAKSE), 1-7 oktobro 2023 en Rozoj (Costa Brava), proponas tre riĉan programon, kulture gastronomie naturamike. Du plentagaj ekskursoj kongruos kun interesaj programeroj, interalie vizito de historia arkivo proksime al Ĝirono, tuj post la vendreda seminario dediĉita al bibliotekoj, gvidota de Ruben Fernandez kaj Bernhard Tuider.

Dum la lasta somero Kultura Centro Esperantista organizis lingvotestan sesion en Ĉaŭdefono, laŭ LTSEC, la sola kiu aplikas al esperanto ĉiujn ses nivelojn de la Komuna Eŭropa Framo de Referenco. Diplomiĝis c-ino Cristina Stefani (nivelo intera, aŭ B1) kaj prof. Igor Rapp Arraras (nivelo kapableca, aŭ B2). La ekzamenoj okazis reale: la Esperanta Civito ne agnoskas telematikan testadon.

Post apenaŭ unu jaro Albert S. Garrido lasis la prezidon de Tutmonda Esperantista Junulara Organizo, kaj entute la gvidajn organojn de la Junulara. Certe influis personaj kaj profesiaj engaĝoj, kiuj nun okupas lian tutan tempon. Profesie li estas instruisto pri la angla kiel (ĉies?) dua lingvo en Hispanio (perfekte por finvenkistoj…). En sia adiaŭo al la Komitato li esprimis zorgon pro la sekureco de la tradiciaj esperanto-kongresoj.

Jam de kelkaj jaroj progresas en la malnova Esperantio la tendenco defendi multlingvismon en internaciaj institucioj. En tiu defendo esperanto ne estas menciata, tiel ke Ivo Lapenna plendus (se li vivus) ke UEA riskas proponi la lingvan problemon mem kiel solvon de la internacia lingva problemo. Lastatempe ankaŭ raŭmistoj okupiĝas pri la temo, sed kun alia taktiko.

“Ni sufiĉe multe antaŭenigis la diskuton pri AKSO, kaj kun la persisto de la nova Estraro, ni espereble atingos definitivan, reciproke interkonsenteblan solvon kun UEA, tamen des pli akcepteblan por TEJO, kiu fidele prilaboris la projekton dum pluraj jaroj” deklaris Albert S. Garrido en sia prezidinta mesaĝo, kie li dankas al ĉiuj oficistoj sed ne mencias unu: la salajratan programiston de la grandioza retejo, Mia Nordentoft.

Siaflanke la honora UEA-prezidanto Renato Corsetti urĝis la decidon pri daŭrigo aŭ rezigno je la disipe kosta projekto. La decido estis atendata por la lasta tago de aŭgusto, sed la financa komisiono de la Universala prenis por si dek pliajn tagojn.

La Kapitulo de la Esperanta Civito kunsidos en Ĉaŭdefono, 12 septembro 2023, kun telematikaj partoprenoj el Hispanio, Italio kaj Bulgario. Estas invititaj ambaŭ senataj grupestrinoj: pro ilia alesto eblos formaligi la kunvokon de la ordinara Parlamenta sesio en Budapeŝto, 20 majo 2024, koincide kun la sesa Danuba Esperanto-Rendevuo, laŭ invito de la paktinto Fajszi Amika Rondo.

La geopolitika tagordero estos dediĉita al Afriko, laŭ la kontribuoj de afrikaj parlamentanoj. Gvide de la vickonsulo pri internaj aferoj la Kapitulo ekzamenos la diversajn kongresojn preparatajn por 2024.

La ekzekutiva povo estos detale informita pri nova projekto de fondumo Pro Esperanto, kaj donos sian opinion al la fonduma konsilio.

La milito en Ukrajno baldaŭ atingos la sescentan tagon. Ankaŭ per sia daŭro ĝi similiĝas al tio kion Eŭropo spertis en iama Jugoslavio. La strategio de la rusa Putin plejparte ripetas tiun de la serba Miloseviĉ: la “granda Rusio” elvokas la fantomon de la “granda Serbio”. La reakiro de (parte) ruslingvaj teritorioj fare de Moskvo memorigas la ekspansion de Belgrado en Kroatio, Bosnio, Kosovo. Difini nun ĉiujn ukrainojn nazioj analogas difini tiam ĉiujn kroatojn ustaŝoj.

La esperanta popolo, unuavice la establoj aliĝintaj al la Pakto, bezonas arkivistojn kaj bibliotekistojn. La Esperanta Civito subtenos projekton de Kultura Centro Esperantista por trejni katalogistojn kaj samtempe realigi la katalogon de la lerneja biblioteko de KCE. Tiucela staĝo okazos en la Esperanto-Domo dum du semajnoj, 13-27 aŭgusto 2024, sub la gvido de c-ano Ruben Fernandez.

Civitaj stabanoj estas la unuaj partoprenontoj al kiuj sin direktas la staĝo, el kiu rezultos la kapablo katalogi libraron kaj disponigi la katalogon de KCE perrete. Certagrade oni kreos modelon, utiligeblan en aliaj lokoj, unuavice la Tanganika Esperanto-Domo en Bujumburo; el tio fontas interalie la strebo venigi almenaŭ unu burundianon.