novembro 2014

Bonan ŝancon alportis la unua intensiva kurso ĉe la naturamika Esperanto-Domo en Malago: tri el la kvin aliĝintoj trovis laborpostenon tuj antaŭ la kurso aŭ en la unua tago. La kurso, gvidata de sen. Giorgio Silfer, daŭris kvin tagojn po tri horoj matene, 10-14 novembro 2014.

La fondumo Fajszi Amika Rondo en Budapeŝto havis sian monatan literaturan kafejon hieraŭ vespere en la Landa Fremdlingva Biblioteko (OIK). Ĉi-foje la programo estis dediĉita al la mondfama hungara/esperantista verkisto István Nemere, kiu 8 novembro 2014 festis sian 70-jariĝon.

La Ĝenerala Asembleo de la Forumo Junulara Europa, ĵus okazinta en Cluj-Napoca (Rumanio), akceptis amendon de TEJO por havi siajn kampanjojn en pluraj lingvoj, kaj ne nur en la angla — kiel okazis ĝis nun. Tiu ĉi sukceso des pli valoras ĉar la estraro de FoJE donis sian kontraŭan opinion antaŭ la voĉdono.

La karmemora Vickonsulo Ljubomir Trifonĉovski, kun delego pri kulturaj aferoj, en 2013 proponis al la Kapitulo iniciaton ĉe Unesko (kies ĝenerala direktoro estis lia samŝtatanino): atingi la enigon de esperanto en la liston de la monda spirita heredaĵo.

La estraro de Germana Esperanto-Asocio decidis je plimulto ĉesigi la lukontrakton de teretaĝa apartamento en la Esperanto-Domo de Liĥtenbergo, orienta kvartalo de Berlino. La nova sidejo, en alia kvartalo, estas jam trovita, kaj GEA migros tien jam en januaro 2015.