En perfekta akurateco aperis la papera eldono de “Heroldo de Esperanto”, numero 2298 (julio 2019). La informilo de Kultura Centro Esperantista proksimiĝas al la centa jaro per intera jubileo: la 2300a numero, sama nombro kiel la poŝta kodo de Ĉaŭdefono.
Surpriza rezulto en la baloto por la Komitato de Universala Esperanto-Asocio: prof. Duncan Charters, kiu kandidatas kiel prezidonto de la Asocio, ne estis elektita. La individuaj membroj partoprenintaj en la baloto verdiktis favore al tri elirantaj estraranoj (Emilio Cid, Lee Jungkee kaj Alex Kadar), plus TEJO-reprezentanto Michael Boris Mandirola kaj eksdirektoro Osmo Buller.
“Literatura Foiro” n-ro 300 (aŭgusto 2019, 64-paĝa) estas jam presata, kun admirinda akurateco kiu ŝajnas nesuperebla.
HeKo 712 9-C, 3 jul 19
Kultura Centro Esperantista interpelaciis la Kapitulon pere de sia parlamentano, ĉu oni rajtas ekzameni laŭ LTSEC (LingvoTesta Sistemo de la Esperanta Civito) per skajpo, almenaŭ parte. Jen la respondo.
Ĝojo el Hanojo, nuna prezidantino de Tutmonda Esperantista Junulara Organizo, faris neanoncitan privatan viziton en la Esperanto-Domo de Svislando. Ŝin akceptis c-ino Anna Bartek, sekretario de Kultura Centro Esperantista.
HeKo 713 2-C, 7 jul 19
Disvolviĝos ĉi-semajne ĉe Kultura Centro Esperantista la tria eksperimenta kurso pri tradukarto, sub la gvido de d-ino Perla Martinelli. Partoprenos tradukemuloj el la tri ĉefaj lingvaj areoj de Svislando, kvankam neniu el ili estas sviso aŭ loĝas tie: la kurso estas centprocente transnacia.
La sindikata situacio en Universala Esperanto-Asocio fariĝas pli kaj pli malkvietiga. La (parte) maldungotaj oficistoj altigis siajn financajn pretendojn, laŭ deklaro de komitatano Rob Moerbeek. La risko de konflikto inter la labordonanto kaj la burokratoj daŭre ŝvebas super UEA.
La financa situacio de Universala Esperanto-Asocio estas pli malbona ol oni jam sciis. En 2017 la deficito tanĝis 160.000 eŭrojn, en 2018 nur cent mil, sed en 2019 ĝi superos 140.000 eŭrojn, laŭ ĵusa komuniko de la UEA-prezidanto, d-ro Mark Fettes.
Dum UEA, TEJO kaj eĉ SAT-Amikaro suferas pro strukturaj deficitoj, Kultura Centro Esperantista progresas kun pli kaj pli sana spezado.
HeKo 713 6-C, 13 jul 19
La sukcesa tria eksperimenta kurso pri tradukarto, morgaŭ finota en Kultura Centro Esperantista, sub la gvido de c-ino Perla Martinelli, fermas la unuan fazon de projekto Nurenbergo, celanta la kreon de lernejo por tradukistoj (pli malfrue ankaŭ interpretistoj) al esperanto, partnere kuplita al efektiva, universitatnivela institucio, prefere en Svislando.
