“Konsentite kun la respondeculoj de prezidantaro de la Hungaria Esperanto-Asocio (HEA), ni ŝatus kontaktiĝi kun Vi (…) por ke ni povu kandidatigi Vin kiel prezidanton de HEA. Post kiam Vi akceptos la kandidatigon, ĝi estos proponita al la Asembleo de HEA.
La delegito de Esperanta Naturamikaro ĉe la Jara Konferenco de Naturamika Internacio, c-ano Giorgio Silfer, renkontis ĉi-semajne la prezidanton de la itala naturamika federacio, s-ro Christian Facchetti, por analizo de la situacio en la naturamika movado, trafita kiel multaj de la pandemia konjukturo, kiu kaŭzis la virtualigon de la konferenco mem, kaj la nuligon de jubileaj aranĝoj.
Fajszi Amika Rondo invitis la faman verkiston Julian Modest al telematika renkonto kun la (ne nur hungara) legantaro, 2 julio 2020 je 18h00, per skajpo.
La aŭtoro, vicprezidanto de Esperanta PEN-Centro, prezentos sian plej novan verkon: “La ĉasisto de sonĝoj”.
La Komitato de Tutmonda Esperantista Junulara Organizo baldaŭ elektos la novan Estraron (por unujara mandato). El la eliranta rekandidatiĝas nur du: la vjetnama BUI Hai Mung (kasistino) kaj la brazila Karina Goncalves de Souza de Oliveira. Pliaj du virinoj revenus post mandata paŭzo: Charlotte Scherping Larsson kaj Konstanze Schoenfeld.
HeKo 738 2-C, 30 jun 20
La Senato de la Esperanta Civito
KONSTATAS ke la nuna pandemio grave kompromitis la efikecon de la sanitara sistemo en multaj landoj, sed pli ĝenerale ilian socian kaj kulturan vivon per trud-izolo, fermo de landlimoj, krizo en la komunuma vivo, altigo de la senlaboreco kaj restrikto de la persona libereco ĝis nivelo nekonata en la demokratioj post la dua mondmilito;
La julia numero de “Heroldo de Esperanto” (2310) survojas al sia abonantaro, akurate kiel kutime. La unua paĝo emfazas la rolon de Plena Ilustrita Vortaro, per mesaĝo de la Lingva Komitato okaze de ties ora jubileo kaj per artikolo pri la presata lasta eldono.
Sukcese disvolviĝis la telematika literatura renkonto kun c-ano Georgi Mihalkov (Julian Modest), kiu ne nur prezentis “La ĉasisto de sonĝoj” sed ankaŭ laŭtlegis el ĝi mallongan novelon kaj unu eseon. Ĉi-lasta klarigas kial li lasas la legantojn mem fini la librojn kiujn li verkas.
HeKo 738 5-C, 5 jul 20
La Kapitulo estas kunvokita al ordinara skajpa kunveno, 15 julio 2020 je 10h00 (MET), sub la prezido de la Konsulo, sen. Riichi Karibe.
En la tagordo prioritate situas la diskonigo de la rezolucio pri la pandemia konjunkturo, kiu ekzistas jam en pluraj lingvoj, danke al la diligento de pluraj gecivitanoj: angla, hispana, hungara, itala, portugala, svahila. Kurioze, mankas la franca.
Estas jam survoje al la fidela abonantaro la aŭgusta numero (306) de “Literatura Foiro”, ne nur la plej longdaŭra kaj konstanta, sed ankaŭ la plej akurata kultura revuo en esperanto. La esperiga poemo de Giorgio Silfer akompane al vraka sed ne marasma internaĵo arte fotita de Nicola Bertelotti kvazaŭ emblemas la enhavon de la 64-paĝa numero.
Naturfreunde Internationale kongresos en Vieno 28 novembro 2020. La dato estas fiksita post interna konsultiĝo, kiun partoprenis ankaŭ Esperanta Naturamikaro. Male, ENa kaj tri aliaj federacioj ne partoprenis en referendumeto pri modifo de la statuto, kiu donas al la estraro la eblon transformi realan al virtuala kongreso.
